Jedan mještanin Petnjice nehotično je, gaseći svoj auto na kojem je izbio požar, zapalio okolnu šumu.
Incident se dogodio na lokalnom putu od Petnjice prema selu Bor i to tako što je vozač, u namjeri da ugasi požar na svom automobilu, iz gepeka umjesto bidona sa vodom izvadio bidon sa rezervnim benzinom i polio auto.
Kako pišu Vijesti, tada se vatra rasplamsala i proširila na šumu u okolini, a on je bio prinuđen da pozove vatrogasce iz Berana.
“Kada je shvatio da je umjesto vode u bidonu benzin, on ga je mahinalno bacio, a onda se vatra raširila na šumu. Automobil je prilično havarisan u požaru, a šumu smo uspjeli da spasimo. Kada smo dobili poziv, najprije smo pomislili da je u pitanju šala, sve dok čovjek nije zavapio: ‘Aman, ljudi, nije važan auto, spasavajte šumu’”, ispričao je portalu Vijesti jedan od beranskih vatrogasaca.
Mjesto incidenta od Berana je udaljeno više od dvadeset kilometara. U Petnjici još ne postoji vatrogasna služba.
